The Girl Who Cries Blood

من الحالات المرضية .. الغير مفهومة .. بنت تبكي دما بدل الدموع ..

لانقول .. الا الحمدلله الذي عافانا مما ابتلى به غيرنا ..

حلويات صافي ..بسوق السالمية

وانا اتمشى بسوق السالمية .. شفت محل حلويات الصافي .. بالنسبة لي اول مره ادري انه لهم فرع بهاالسوق .. وعلى حسب كلام اللي يشتغل يقول انه صار لهم سنة تقريبا ..

ويوم الاثنين القادم .. راح ينزلون معجنات جديده ... على كلام الفلبنيني اللي يشتغل .

ثاني يوم عيد 2010

ثاني يوم العيد .. وفترة الصبح والضحى .. اخذتهم راحة لي .. وما طلعت من البيت .. بس حزة الظهر .. رحت مع عايلتي تغدينا برا البيت ... وما كان في بالنا مطعم معين .. ولا حجزنا لنا من قبل .. قررنا واحنا بالسيارة نروح الافينيوز وهناك نقرر اي مطعم .

ولما وصلنا المجمع . الا ما شاء الله زحمة الناس ما تخلص بهالمجمع .. واستغربت ان ليما الحين الناس تتسوق وتشتري .. انا قلت قبل رمضان يشترون عشان العيد .. بس الحين هم يشترون .. ما شاء الله عليهم ..

المهم رحنا صوب السينما قلنا يمكن نشوف فلم وناكل بالسينما .. بس لما شفنا الزحمةوالطابور عليها هونا ..دخلنا صوب المطااعم اللي يم السينما ... والا مافيه زحمة واايد عليهم .. واحد بس اللي ما شاء لله طابور عليه ...

عاد انا قررت وقلت ابي مع الناس .. على المطعم لاني مليت من اكل الشرقي .. وعاد صفطنا مع الناس على مطعم فرايديز ..والحمدلله حظنا حلو .... بسرعة نادونا .. ما طولنا بالانتظار ..

وطلبنا وجباتنا .. اول شي عصير التوت البارد ..

وعصير الليمون ..الازيرق

المقبلات .. مكرونه بالجبن .... اكثر شي عجبني .. يمي يمي .... زين لحقت على وحده وصورتها هههههه

السلطة الخضره .. هم حلوة .... حبيتها


والوجبات الرئيسيه .. دياي مع المشروم وبطاط مهروس
البطاط بصراحة واايد حلو.. واكتشفت سبب حلاته .. لقيتهم خالطين معاه ذرة بس مو مبين لانه مهروسين مع بعض
بس حلو ... قلت راح اجربها بالبيت :))
الطبق بالنسبة لي .. حلو

همبرجر .. حدها عاديه .. وكان البرغر يابس شوي .. والصمونه حيـــل متينه ..

مره ثانيه ابدا ما راح نطلبها ... :(

الوجية الثالثة ستيك ... بس ما صورته ... هم كان عادي ...

بعد ما خلصنا من المطعم .. تمشينا بفاتاسي وورد .... وبعدها وهو الاهم بالنسبة لي ..... رحنا حق اللي كنت انطره من رمضان

يعني شهر وانا انطر متى العيد عشان أكله .. تدرون شنو اهوااا .... بنك بري :))))) يمي يمي يمي .. وعلى قوله ملاك في اميمه في دار الايتام .. أقــوى شي :))

والحمدلله ... والف الحمدلله .. العيد كان .... اقوى شي بالنسبة لي :))

ايام العيد الفطر 2010

هالسنه هذي احسها غير عن السنة اللي طافت واللي قبلها .. صارت في اشياء يديده غيرت من امووور كثيره في فرحتنا بالعيد ..
راح اتكلم عنها في السطور اليايه ..

زمان ... اول يوم عيد .. بعد صلاة العيد وبعد التجهيزات من لبس وغيره ... كنت اروح اعيد على بيت اهلي .. اعيد في ابوي الله يحفظه لنا وامي (الله يرحمها ) وعمتي الله يحفظها وكان بيت اهلي عباره عن ثلاث صالات وكل وحده بصوب .. وكنا نحوس بين هالصالات .. ناخذ العيادي ونروح نلف على بقيه الاهل ..لين يخلص اليوم ..

السنة الي طافت والسنة اللي قبلها ... كان العيد ماله فرحه كبيره بالنسبة لي ... يعني كنت اروح بيت اهلي واحس انه في شي ناقص ..

ما كانت الفرحة كاملة بالنسبة لي ..لانه وفاه امي ما صار له فتره كبيره .. كان الكل يمثل انه فرحان عشان ما يضيق خلق الثاني

وعشان اليهال يستانسون وما نحسسهم ان احنا صايقه خلوقتنا .. بس كان الكل بينه وبين نفسه .. يحس انه في شي ناقص .. فيه شخص ماهو موجود معانا الحين .. خصوصا اذا كانت الشخصية محبوبه حيـــل من الجميع الكبير قبل الصغير ...( الله يرحمها ويتغمد روحها الجنه )

لكن هالسنة وايد غير ... بالنسبة لي انا شخصيا احس اني فرحت بالعيد .. اكثر من السنتين اللي طافوا .
فيه امور جدت وغيرت شوي من اجواء العايلة ... اول شي تم فتح الصالات على بعضها وصارت صاله كبيره نسبيا وصار الكل يقعد بجلسة وحده .. يعني بدل ما كنا متفرقين باكثر من صاله .. صارت يمعتنا بصاله وحده بس .. واايد هالتغيير جمعنا أكثر من قبل .

حتى برمضان ويمعتنا فيها صار له طعم غير ..

التغيير الثاني .. اول يوم بالعيد ... جهزت انا وبنتي وزوجي مبجر .. والساعه ثمان ونص انا عند بيت الاهل .. تريقنا مع بعض وكانت القعدة واايد حلوة ..وكان ابوي وايد مستانس حتى عمتي وكان اخوي موجود مع عياله .... واحنا على الطاوله كنا ننطرالخبز الايراني .. وبعضنا ما صبر واكل من الخبز اللبناني .. كان الريوق كامل .. بيض وجبن وقيمر ومربى وزيتون وحليبه مهيله مع شاي .. وكنا متلهفين حيـل على الريوق من بعد رمضان .. الله يديمها علينا هاليمعه يا رب ..ويعود علينا وعليكم بصحة وعافيه .. آمين ..

والتغيير الثالث .. انا واهلي مو من الناس اللي تطلع تتعشى برا او تتغدى براا . بسهوله .. يعني اذا صارت تصير كل سنتين مره بس هالسنة باول يوم عيد .. تعشينا بمطعم وكانت اليمعه بس انا واختي واخوي وبنات اختي وبنات اخوي .. وقررو البنات انهم يودونا مطعم :

ليتز برغر .. اللي بمجمع 360

والكل طلب وجبته اللي يحبها .. هذا طلبي انا :) يميمي ,, هبمرجر بالمشروم

وهذا طلب اخوي ...

واختي طلبت همبرجر بالجبن ..

طلب بنت اختي اتوقع برجر بالجبن بعد ..

طلب بنت اختي الثانيه ...

طلب بنتي ..وبنت اختي طلب خاص .. السلطة والبرغر على مزاجهم

وطلب المكرونة مادري منوطلبها .. نسيت :))

بس كانت وااايد حلوة الطلعه ... انا شخصياا استانست حيــل
وان شاء الله تكرر على طووول .. مع ان المجمع كان زحمة حيــل .. بس الحمدلله ما تضايقنا كنا لاهين بالاكل ههههه

والبوست الياي .. راح اتكلم عن ثاني يوم عيد وين رحت .. :)

تقبل الله طاعتكم

السلام عليكم ..

اخيرا رجعت لعالم التدوين .. ومشاركة المدونات والمدونيين ... من بعد غياب تقريبا شهر لتمتع بطعم رمضان ..يا حلوة من شهر طااف بسرعه حيــل .. الله يعطينا عمر واياكم .. ونصومه السنة اليايه يا رب .

اليوم .. يعتبر اول يوم للدوام الرسمي من بعد اجازة العيد .. بس انا الى الان في اجازة وما داومت .. قلت اريح شوي من بعد تعب لوية العيد .. وفرصة عشان اصوم الست من شوال قبل لا اداوم ..

واليوم بعد .. يعتبر اول يوم دراسي حق بنتي .. الله يحفظها لي يا رب .. واول مرحلة دراسية يديده عليها .. صارت مع البنات الكبار الحين .. يعني رجعنا حق لويه الدراسة والتجليد ونروح نشتري اغراض المدرسة .. الله يعينا ان شاء الله ..

المهم ... ولهت حيـــل حيـــــــل حق التدوين .. وولهت على كل شخص شاركني في مواضيعي .. وولهت على قرايه موضيعكم ..

من اليوم راح ابدا بمشاركة اخواني وخواتي بمواضيعهم .. وراح اعلق على مواضيعهم .. حدي مستانسة .

واقول حق كل شخص زار مدونتي ,,,, شخباركم ..؟ وتقبل الله طاعتكم ... وعيدكم مبارك .. :)))

البوست القادم راح اتكلم عن ايام العيد .. شلون قضيتها ووين رحت ..