صار لي جم بوست احط بعض المواقع اللي يمكن نستفيد منها ..
بس اليوم ما راح احط موقع يديد .. راح اخليه ليوم ثاني :)
لانه اليوم ابي اتكلم عن موضوع مهم بالنسبة لي .. ومحيرني بنفس الوقت ..
الحين شنو الهدف من اني فتحت مدونة خاصة فيني ؟؟؟؟ وبعد ما فتحتها شنو راح استفيد ؟؟؟؟
ودي اقولكم قصتي مع جاكليت ...
بالبداية .. قبل لا انوي فتح مدونة ماكنت اعرف شنو يعني بلوق اللي كنت دايم اسمعها من عيال اخوي .. لين ما شرحلي ولد اخوي عنها وشنو يمكن احط فيها حسيت انها تجربه ممكن اعيشها واشوف نتايجها .. وفعلا قمت افكر شلون افتح مدونه لي .؟ لكن استصعبتها
لاني سمعت انه لازم يكون لي موقع خاص فيني !! وفيها رسوم اشتراك ومادري شنو ... خلاني افكر اني اهون وما افتح كللش بلوق ..
لكن في يوم من الايام وانا اتصفح النت شفت اعلان من قوقل انه تقدر تفتح بلوق بدون رسوم وبكل سهوله .. قلت خل اجرب .. وفعلا
تتبعت الخطوات الخاصة باعدادات البلوق واصبح الحين عندي بلوق او مدونة خاصة فيني ..:)) ( حدي مستانسة )
وكان شكل البلوق بالبداية كللش بسيط .. وكل يوم اقول لازم اغير شكله مو عاجبني ... لين وصلت الحين للشكل اللي تشوفونه الحين
( وتوقعوا انه يتغير .. باي وقت لين الاقي شكل حلو ) .
وبديت احط مواضيع مختلفه .. مره عن يومياتي .. ومره عن الطبخ .. ومره عن مطعم .. ومره عن اشياء اشوفها اما بالجمعيات والا مركز سلطان والا حتى بالسوق.. ومره عن مواقع .. مواضيع مختلفه عشان اقدر اخلي مواضيع مدونتي على مسماها .. جـاكــليت
لكن ...شنو راح استفيد من هالمدونة ؟؟؟؟؟ الحين .. وبعد ما صارت عندي واقدر اضيف اي موضوع انا ابيه ...
شنو العائد من ورا اضافتي لمواضيع مختلفه بين فتره وفتره ؟؟؟
سؤال محيرني ....؟؟؟؟!!!!!!!
ودي اسال كل شخص يمتلك مدونه خاصه فيه ... شنو هدفك الاساسي من فتحك لبلوق او المدونة ؟؟؟
لعل وعسى الاقي اجابتي من ضمن اجابتكم ؟؟؟
*************************************
انا لما اصير يوعانه .. ومالي خلق اكل البيت لانه يكون ممل بعض الاحيان ..
ما افكر الا بوجبه انا احبها حيـل واستانس على اكلها ..
احسها فيها طعم وذوق حلو ... وبنفس الوقت رخيصه وماهي غاليه
شوفوها بالصوره
سمبوسه جين + جباتي + صمون فلافل وبطاط او مشكل + شاني
هذا عشان اليوم .. :)
انا عرفت التدوين من سنين وكل مرة كنت اسوي مدونة
ردحذفاسبوع وعقب انساها
وقبل سنة سويت مدونة حقوقي وكنت اتوقع يكون مصيرها مثل اللي قبلها
لكنها كانت مختلفة اني مركز على الامور السياسية فيها
وبدي اهتم فيها وانشرها لين ما انتشرت
وعقب سكرتها وسويت مدونتي اللي الحين لو كويت
لأسباب عديدة ذكرتها
المهم شنو ابي من المدونة؟
ابي اكتب اللي بخاطري
ابي اناقش امور ومواضيع وخصوصا سياسية
و....بس :)
قواج الله
عرفت البلوقات من اول سنه بالجامعه او قبل بشوي اي اتوقع بالثانويه ههههه مادري
ردحذفالمهم
كنت اتابع وايد بلوقات سياسيه وكنت مفكره اسوي لي بلوق
بس ما سويت قلت اخلص دراستي واتفرغ لها لان ايام الدراسه ما عندي وقت
وبس تخرجت من الجامعه شهر 6 عقب ما ريحت شوي شهر 7 فتحت لي البلوق
والهدف الاساسي منه انه يكون مرجع او ارشيف استفيد منه انا شخصيا وافيد الناس معاي
خاصه واني قبل لا اسوي البلوق كنت وين ما اروح امشي واصور فقلت احطها بالبلوق تكون موجوده عندي وانتوا تشوفونها معاي
شكرا :)
بالنسبة لي فتحت البلوق فجأة وبدون هدف بالبداية وما نزلت فيه الا بوست واحد ونسيته بعدين .. بعد فترة لقيته وقررت انزل فيه بوستات منها تظل ذكرى على طول شي ما راح ينمحي وبعد سنين اقدر بكل بساطة اشوف بلوقي واتذكر هالأيام وبعد عشان افيد واستفيد منكم وافضفض عن اللي بخاطري
ردحذفبالعااااافية =)
الله يسلمج خوش سعال وخوش موضوع :-)
ردحذفمن عرفت النت من قبل 13 سنة تقريبا وانا أفتر بين المنتديات والمواقع وىخذ معلومات واحمل برامج وأستفيد من الشروحات
ومع الوقت بدينا نتطور صرنا مشرفين ببعض المواقع وصرنا كتاب ببعض المواقع
لكن مشكلة المنتديات انها اصبحت موضه قديمة
فألو هدف هو : ان زمن الاخذ خلاص خلص يمعت معلومتا لين قلت بس
الحين جاء وقت العطاء انك تعطي مثل ما أخذت وهاذي هي سنة الدنيا
أيضا إفادة الناس والخوف عليهم من النصب او اختصار الوقت لهم بمعلومة مفيدة أو شي
شخصيا مافتحت البلوق الا قبل 10 أشهر اقترح علي واحد من الربع بتويتر اني اسويلي موقع واحط فيه كل المعلومات الي قاعد أطرحها في تويتر أو المطاعم الي كنت أزورها
وفعلا فتحت المدونة ولله الحمد ماظنيت اني استمر خاصة مع ابتعادي عن السياسة وحلفت اني ما اخوض فيها خاصة الواقع المريض في الكويت
الىن الحمد لله الزيارات لموقعي باليوم ماتنزل عن الالف بفضل الله وحده
شكرا اختي جاكليته
فتحت المدونة حتى أبين شخصيتي من خلال مواضيعي. يمكن فيه مجموعة تتابعني ويمكن لأن حتى لو كان شخص واحد يتابع الي اكتبه هذا يكفيني. أحب اتكلم وأقول وبالمقابل أشوف أحد يسمعني لأني بحياة الواقع ماعندي صداقات.. عندي زمالات عادية بس صداقة مافيه، والمدونة تعوضني عن وايد أشياء منها هالشي.. وبالعافية عليج يارب
ردحذفle koweit
ردحذفشاي الضحى
هديل
ابو فلان
قلم ومساحة
يعطيكم الف عافيه ... والمزيد من التفوق و العطاء في مدونتكم ..
اعتقد هدف فتح اي مدونة هو حب المشاركة
ردحذفودنا نشرك الغير في افكارنا
نتفاعل مع الناس و نخليهم يتفاعلون معانا
و هذي جزء من الطبيعة البشرية
ميزة المدونة عن المنتدى انج تختارين الناس اللي تبين تحتكين فيهم
اما المنتدى فينفرض عليج ناس الله لا يوريج
شكرا على البوست الجميل
وصباحك كله خير ياجاكليت ... يسعدني تفضلك بمطالعة مدونتي المتواضعة ... وماقرأتيه لاعلاقة له بحياتي الشخصية ... هي محاولة لمساعدة بعضنا البعض على فهم الحياة على نحو أفضل ... وزيارتي لمدونتك لشكرك وبإذن الله أوالي الزيارة للاستفادة .
ردحذفهلا
ردحذفانا عن نفسي أحب الكتابه واعشق الشعر كنت أطلع ابداعاتي في المنتديات بس ما خذيت راحتي
يوم فتحت البلوق عبرت فيه عن آرائي ومزاجي وكل شيء احب افضفض من خلال البلوق .
ريماس
ردحذفبالتوفيق يا رب في ممدونتك .. والمزيد من النجاح .. والعفو ك)
ـــــــــــــ
تركي الغامدي
لي الشرف اني اشاكرك في المدونه الهاصه فيك .. وشكرا لك لتوضيح المعلومات لي ..
وشرفت مجونتي المتواضعه :))
ــــــــــــــــ
مزيونه
حلو الشخص لما يفضفض .. ويلاقي اراء اشخاص ثانيه عن فضفضته .. وموفقه في مدونتج يا رب ..
مرحبااااا
ردحذفامممم اكتشافي لعالم التدوين جا صدفه ..
عشان انشر اللي اكتبه ومع الايام تنوعت تدويناتي ..
لكن شو الهدف وشو نستفيد ..
فتتعرفين على ناس من دول ثانيه فأنا بصراحة معظم ربعي في التدوين من الكويت ^^
وغيرها تحصلين ناس لهم نفس اهتماماتج وتقرين وتستفيدين ووقتج ابد مايضيع لانه شي مفيد بعكس الموقع الثانيه
^^
شسالفتكم على الجبااتي هالايام؟؟؟
ردحذفولا عشاني ريجيم والجباتي بالحسرة علي؟؟؟
سؤالج حلو...
فتحت بلوقي عشان اكتب مثلكم
والحين اتابعكم اكثر مااكتب
يعطيج العافيه
ردحذفخوووش موضوع وخووووس سؤال وخوووووش سمبوسه
انا ما عندي بلوق بس اتابع من بعيد لمن افضى
ام حروبي
ردحذفيا بختي
غير معروف
يعطيكم الف عافيه .. والله يوفقكم في مدوناتكم ... واللي ماعنده بلوق .. الله يوفقه في متابعته للبوقات :))
مساج الله بالخير جاكليت ..
ردحذفبالنسبة لي اشوف فيها فوايد وااايد ..
تسمعين سوالف يديدة .. تشوفين مواقع يديدة ..
تقرين تجارب الناس وتستفيدين ..
عليج بالعافية .. بس وين اللي يبيعون جبارتي بليل ههههههه
اقولج شي جربي صمونة او جباتي << يحطون داخلها ((سمبوسة وسلطة وبطاط وطيحينة ))
وحدة تكفيج هههههههه جد لذيذة اتريق فيها مرات ..
بس اذا معدتج ماتستحمل لا تجربينها ههههههه
^_^
أزال المؤلف هذا التعليق.
ردحذفمساء الخير يا حلوة
ردحذفأول شي عليج بألف عافية:)
وبصراحة هذا أكلي المفضل :p
أما بالنسبة للسؤال فأول شي آنا عرفت عالم البلوقات من رفيجتي وبصراحة حبيته وايد
وبالنسبة لبلوقي, فتحته عشان أفضفض فيه وأكتب فيه كل شي بخاطري وحرصت إني أنوع فيه ما بين النقاش ( مو السياسي طبعا لأني أكره السياسة )والمواقف اللي تمر علي بحياتي والمختارات الأدبية.
يسعدني إني أكون من متابعين بلوقج وأضيفه في قائمة البلوقات اللي حبيتهم في بلوقي :)
المطيري
ردحذفالله يعافيج ..
تلاقينهم عند المحلات الهندي اللي بالجمعيات .. يبيعون الجباتي :))
راح اجرب طريقتج .. :))
amwaj
ردحذفمساء النور
الله يعافيج ..
يشرفني حضورج ومتابعتج لي ..
تسلمين يالغاليه ..:)
ممممممممم
ردحذفتصدقين بالبداية ماكان لي هدف .. كان فضول وقلت أجرب حتن تلاقين اول تدوينتين لي ماعندهم سالفة
بس عقب كونت لي أصدقاء تدوين .. قمت أعرف أشياء ماكنت أعرفها .. يعني بالعربي أنفتحت عالعالم حواليني وقمت أعرف شيصير بالديرة بالتالي صرت آنا عن نفسي في بعض المواضيع اتكلم عن أشياء تصير بالدية مع إن المدونة كنت ابيها شخصية او كمذكرات شخصية :)
صباح الخير
الوتين
ردحذفصباح الخيرات ..
الله يوفقك يا رب بالتدوين ..
وتقدر تفتح لك اكثر من مدونة .. وحده للمدذكرات .. وحده لاحداث الديره :)
نورت مدونتي المتواضعه :)