الاثنين، 31 مايو 2010

اليوم عليج تجاوبين وبس

اليوم الظاهر .. مكتوب علي .. اني اجاوب على الكثير من الاسئله ...
فبعد ما جاوبت على اسئله في موضوعي اللي قبل هذا .. ياتني اسئله ثانيه على شكل مسابقة .. من مدونه hikuwait .. عباره عن مجموعه صور خاصه بموضوعات المدونه .. واللي متابع للمدونه يقدر بجاوب ويعرف مواضيع الصور... والصوره اللي فوق وحده منهم ..
اول شي قلت والليــه مالي خلق .. بس بعدين قلت يالله .. خل احاول يمكن افوز بالجائزه ... اللي هي عباره عن تذاكر للسينما.. بصراحة ودي اروح لفلم نور عيوني اللي دايما ما لاقي حجز له .. خصوصا ان الكل يمدحه ويقول انه يضحك ..
بس يا ترى .. هل حظي راح يصير حلو وافوز ؟؟ واذا فزت هل التذاكر راح تكون ليوم الاثنين يعني التذكره بدينار ونص ؟؟
تدرون شلون ... خل ننطر باجر .. ونشوف شراح يصير ؟

جوابي على الاسئله

بناء على طلب اختي شاي الضحى اللي اشكرها واايد وحطتني من ضمن
قائمة المفضله عندها .. ما راح اردها .. .. وراح اجاوب الاسئله
استعنا ع الشقى بالله
بسم الله


Last beverage
جاي بالحليب

Last phone call
اخوي من فير الله

Last instant message
حق حماتي بامريكا .. بشوف اخبارهم ولهنا عليهم

Last song you listened to
كان دعاء بصوت عبدالرحمن الحوال بتباشير الصباح
Last time you cried
يوم وفاة الوالدة .. من سنه ونص .. الله يرحمها

Last text message
خبر من كويت نيوز
وهذا نصه : مجلس الوزراء : اعادة فؤاد الفلاح رئيسا لهيئة الشباب والرياضه تنفيذا للحكم

.. يوم يشيلونه من منصبه ويوم يعيدونه مكانه ..طماشة

LIST THREE FAVORITE COLORS
الوردي
والازرق
والبنفسجي


THIS MONTH HAVE YOU
Made a new friend

ايه

Fallen out of love
مادري

Laughed until you cried
ولا مره صارت معاي

Met someone who changed your life
ريلي .. وتغيير للاحسن

Found out who your true friends were
اختي

Found out someone was talking about you
مادري .. بس يمكن اللي بالدوام معاي ؟؟؟

Have you kissed anyone on your Facebook friends list
ما سجلت فيه ولاعندي احد

How many people on your Facebook friends list do you know in real life
شوف جوابي على السؤال اللي قبله

How many kids do you want to have
5

Do you have any pets
لا .. للاسف.. بس ودي يكون عندي... ماسويتها وانا صغيره

Do you want to change your name
ليش اغيره ... لا طبعا

What did you get for your last birthday
كيكة من الخباز وحطيت صورتها ببلوقي

What time did you wake up today
خمس ونص الصبح

What were you doing at midnight last night
كنت احوس بالنت ادور لي تصميم حق بلوقي .. احسه اقرع

Name something you CANNOT wait for
رجعة ريلي من السفر

Last time you saw your father
اليوم الساعه ست ونص الصبح .. وشربت حليبتي معاه

What is one thing you wish you could change about your life
اممممممم مادري بس ودي تكون ترقيه .. خلف الله علي

What are you listening to right now
صخة ولا صوت .. ماكو احد كلللش

Have you ever talked to a person named Tom
منو توم .. هذا ..؟؟ لا ماعندي

Who’s getting on your nerves right now
الماوس اللي احوس فيه الحين.. احط يمين ويطلع المؤشر يسار

Most visited webpage
.. مدونتي
قوقل .. المساعد الحقيقي لي

what’s your real name
مابي اقوله

Nicknames
جاكليته

Status
متزوجه

Zodiac sign
الجوزاء

Male or female
اقولك زوجه .. تقوللي بنت والا ولد ؟؟؟
شتطلع الزوجه ؟؟

University
جامعة الكويت

Hair color
بني فاتح

Long or short
متوسط الطول .. سواء طولي والا شعري

Are you a health freak
اسم الله علي ... لا ان شاء الله

Height
165

Do you have a crush on someone
ايه وااايد ... خصوصا اللي معاي بالدوام

What do you like about yourself
التجديد في كل شي

What don’t you like about yourself
الصمت

Righty or lefty
يمين

FIRSTS
First surgery

عمليه للانف .. بس مو تجميل .... لسد الرعاف اللي كنت متضايقه حيــل منه

First piercing
تراجي .. وليما الحين اقضض فيهم .. بسرعه تنسد

Your first best friend
منيره كانت معاي ايام الجامعه

First award
راديو .. فزت فيه في مسابقه بدوامي .. وليما الحين عندي بمكتبي

First sport you joined
نط الحصان .. وكنت استمتع فيها حيــل ايام المدارس ..

First pet
قطوه .. ويا كثرهم كانو في بيتنا

First vacation
مصر

First concert
فرقه رباعي الكويت .. من زمااااان
وكان بمناسبه عيد ميلاد بنت عمتي والحفله كانت ببيت عمتي

First crush
ما فهمت السؤال .. بس اذا اللي فهمته صح ... تخصصي بالجامعه .. اتقهرت يوم ما رضوا بسجلوني فيه

WHAT ARE YOU
Eating

توست محمص وجبن كرافت

Drinking
ماي
I’m about to
احذف الماوس اللي عندي واشتري غيره

Listening to
مافي في شي اسمعه ... صــخه

Waiting for
ربعي يداومون... ابي احد

YOUR FUTURE
Want kids

اكيــد وان شاء الله

Want to get married
لا .. الحمدلله تزوجت وخلصت

Careers in mind
ايـــه .. خلصني

WHICH IS BETTER WITH THE OPPOSITE SEX
Lips or eyes
شهالكلام ....?? اكيد العين

Hugs or kisses
شكلك .. تحرضني على الرذيله .. اعوذ بالله ...

Romantic or spontaneous
الله يستر من اسئلتك .... رومنسيه يالله

Nice stomach or nice arms
ههههههههه ضحكني سؤالك .. ليش تبي تعرف...؟؟

Sensitive or loud
حساسه حيــــل

Hook-up or relationship
انا قايله ... اسئلتك تحرض على .. ماني بقايله

Trouble maker or hesitant
متردده ... وواضح ان ماخذيت قراري بسرعه والا ماكنت جاوبتك اصلاا

Lefty or Righty
لا مو عسماوي

Shorter or taller
طويل شوي

Older or Younger
لا هذا ولا ذاك
.. بالوسط ... اكيداعرفه مو ريلي ؟؟

HAVE YOU EVER
Lost glasses/contacts

لا الحمدلله .. ويا ويلك اذا صارت
Ran away from home
ليش مينونه ...؟

kissed a stranger
ويــع .. لااا

Drank Pepsi
ايه .. وهالايام طايحه بالدايت

Broken someone’s heart
لا ان شاء الله ... الله لا يقوله

Been arrested
اسم الله علي ... لا

Turned someone down
امممممم ايه

Cried when someone died
ايــه
Liked a guy/girl friend
اكيد صديقه

DO YOU BELIEVE IN
Yourself

ايه

Miracles
هم ايه

Love at first sight
شهالخرابيط ... ما عندنا هالكلام

Heaven
اكيــد

Santa Claus
لاا ...

kiss on the first date
لما يابولي بنتي وانا بالمستشفى .. بستها على خدها وكانت مربربه اسم الله عليها

ANSWER TRUTHFULLY
Are you happy with your life

اللهم لك الحمد

Is there one person you want to be with right now
اي والله

Had more than one boyfriend/girlfriend at one time
الحمدلله .. عندي صديقات

Do you believe in God
اكيــد

Posting this as 100 Truths
من وين اييب 100 ؟؟؟
بدز حق اللي اعرفهم بس

I'm tagging
hikuwait
ShaYmoOoNa
made n q8
روميه فهد
الوتيـن

الأحد، 30 مايو 2010

يومياتي كأم

اليوم ما سويت غدا ...
ورجعت من الدوام تعبانه .. وقلت ودي انسدح شوي ..رحت لفراشي وتوني لاامه مخدتي الا تييني بنتي .. وصار هالحوار ..
البنت : اماا اماا .. هالايام مافي يمه
الام : تسمع وتسوي روحها نايمه
البنت : امااا اماا ساعديني
الام : ترد عليها بدون ما تشوفها .. لانها اذا شافتها ما تقدر تقاوم طلب البنت
شتبين ؟؟؟
البنت : اماا شوفي . شوفي
الام : وهي مغطيه راسها باللحاف ... ششوف ؟؟
البنت : اماا شوفي .. ساعديــني
الام : تتنهد وتوخر اللحاف .. هاه ششوف وشساعدج فيه ؟
البنت : ابيج تسوين لي البوستر هذا
الام : وانتي ليش ما تسوينه ؟؟
البنت : اماااا رفيجاتي كلهم سووه بالمدرسه
الام : وانتي ليش ما سويتيه مثلهم ؟؟
البنت : ماكان عندي وقت .. وسويت شويه وطلع مو حلو
الام : رضت بالامر .. وقررت تسويه .. لانها تدري انه بنتها ماتعرف صج
وين البوستر اشوفه ؟
البنت : كاهو

الام : يا حظي شهالخط
البنت : اماا .. قلبي الورقه وكتبيه ... ابيه بالالوان .
يحدث صمت بالبيت .. الام تقولب بالورقه .. والبنت تفتح التلفزيون على قناتها المفضله
البنت : اماااااا
الام : وييعه خرعتيني .. شتبين ؟؟
البنت : اماا يوعانه ابي غدااا
الام: دقي على الخدامه وقولي لها تسوي لنا همبرغر وبطاط .
تروح البنت يم التلفون وتتصل على الخدامه على الرقم الداخلي الخاص فيها وتوصيها على الغداا .
الام حايسه بالوسيله .. شنو تبيني اكتب ؟ وعن شنو موضوعكم ؟؟
البنت : نبي نبيع بوب كورن
الام : تبيعون ؟؟؟
البنت : ايه .. والفلوس راح نعطيها حق الفقاره
الام : اعجبتها الفكره ولقتها فرصه انها تقوم بدور الداعيه الاسلاميه .. والله زين يعلمونكم شلون تساعدون الفقاره .. والمحتاجين ..
يا بنتي دينا الاسلامي يحثنا على مساعده الفقراء والمحتاجين ..وشوفي كم من الاجر راح ناخذ .. ورسولنا الكريم صلي الله عليه وسلم .. وصانا على هالشي
البنت : ويها تغير .. وعيونها راحت للتلفزيون . وفي قلبها تقول .. والليييه انتي الحين سوي البوستر وفكيني . انا بروحي غصب افتكيت من ابله الدين وانتي هني بعد ؟؟؟؟

الام : حست ببنتها .. وقامت تغير الموضوع .. و تقولب بالبوستر ..وين القلم الرصاص والمحايه والمسطره ..؟
البنت : راحت تجهز لامها الاغراض ..
هاج يمه .. ابيه يكون بالاوان .. ابيه يصير حلو ..
الام : طرار ويتشرط !!!
شرايج اطبعها لج بالكوبيوتر ؟؟
البنت : لااااااا التيشجر ماترضى .. تقول لاازم بخطكم
الام : والتيشجر على قولتج .. ما راح تعرف يعني انه مو خطج ؟؟
البنت : اماا انا راح اقولها انج ساعدتيني
هاتي .. وبدت الام تخط البوستر وكتبت الكلام اللي بنتها تقوله لها .
واثناء ماهي تكتب حبت تتغشمر مع بنتها ... ما تبين بعدارسم لج صوره ؟؟
البنت : ايييييييه .. ابيها حلوة
الام : توهقت ... تقول بينها وبين نفسها .. يا ليتني ما حجيت كللش .. انا اللي يايبته لنفسي .
وقامت ترسم الرسمه

.. والبنت شنو كانت تسوي؟؟.. طبعا كانت تشوف هذا

يت الخدامه ومعاها الغدا وحطته ومشت ..
والام لاهيه بالبوستر ..تبين الوان خشبيه والا شينيه ؟؟
البنت : وهي تاكل الصمون .. لاااا مابيها خشبيه ابيها بالوان حلوة
الام : تلون .. وعينها على الغداا .. انا الحين اسويلج البوستر وانتي تاكلين ؟؟
وخري خل اسوي لي صمونه يعت ..وبدت الام تاكل غداها .. دفيقتين .. والا ترجع للبوستر .. لاازم تخلصه
وبدت تلون البوستر

واثناء التلوين انتبهت الام للي مكتوب .. تعالي صج منو بيرو هذول .. اللي بتعطونهم فلوس ؟؟
البنت : اماا بيرو هذولا فقاره
الام : انزين فقاره .. بس من اهما ؟؟ ومن وين ؟
البنت : التيشجر قالت لنا .. هذي دوله بامريكا فقيره ويبون يودون فلوس لهم عشان يساعدونهم
الام : عشتوو ... الحين ما لقو الا بامريكا .. خل يساعدون اللي عندنا ديرتنا هم فيها فقاره واهما اولى
جني هونت مابي اكمل بوسترج
البنت :امااااااا
ويبدو على ويها الغضب
الام : انزين خلاص بكمله .. ما يندره يمكن ناخذ اجرفيهم
ورجعت الام تكمل البوستر


حطيت لج كوريكتر .. جنه نفيش ..
امج مو سهله .. والله ... يا حلاتي وانا افنتق بالالوان
يالله شوفيها .. شرايج ؟


البنت : اللــــه .. حلوة ... انا احسن وحده بالصف مسويه البوستر .. هيييييي خذتها وراحت دارها تخشها بجنطتها وخلت الام..
الام: وعلى ويها علامه استغراب وتعجب .. وتقول حق عمرها .. الحين منو اللي مسويها انا والا اهيا ؟؟
حتى كلمة مشكوره مافي ؟؟؟
البنت : رجعت من دارها وراحت لامها .. اماااا .. مشكوووره وباست راس امها
الام : والله فشله حكمت على بنتي بسرعه ؟؟ صج اني انا الياهل مو اهياا
وسلامتكم

جديد سنيكرز ...



رحت امس الجمعيه وشفت سنيكرز بشكله اليديد
حاطينه بكور وكل كره فيها 12 حبه السنيكرز ..
الظاهر السالفه لها علاقه بالكره .. اللي انا مادري عنها بشي منو يلعب مع منو وضد منو ... مالي بالكرة كلللش .. بس في حاله وحده بس .. اذا المنتخب الكويتي يلعب .. غيره هالشي .. ما اجابل ولا اسمع ..

جني دخلت بموضوع ثاني غير الكاكاو ...؟؟؟؟
المهم هذا شكل الكاكاو السنيكرز اليديد
وهذي الصوره الثانيه

بالجميعه ثلاث الوان .. ازرق واحمر .. وبني

السبت، 29 مايو 2010

كريم الحلزون .. !!!!

سمعنا عن كريم اللوز .. وكريم البندق .. وغيره
بس توصل للحلزون .. ما خلو شي ابداااا


شفته بالجميعه بين الارفف ... وشدتني صوره الحلزون .. قلت شنو هذا ؟؟؟؟ ومديت ايدي عليه وقولبت القوطي .. والا اقرى انه كريم حمايه للبشره من اشعه الشمس
تصدقون شدني الحلزون اكثر من صوره البنت اللي بالقوطي ..
ههههههههههههههه

اشواريا ..



رساله وصلتني بالايميل عن اشواريا واستعراضها في حفل جوائز
iifa 2009
شوفو الفيديو
وقولولي شرايكم بالحفله وفيها ؟؟
http://www.youtube.com/watch?v=FXh4sbMgay0&feature=player_embedded
صار لي ساعه ابيه يصير رابط مو راضي
سوو كوبي وبيست

الجمعة، 28 مايو 2010

يمعه الشاليه ... وفرحتي فيها

اليوم رحت الشاليه الصبح وكان الجو الحمدلله مافي غبااار ... والمايه كانت يايه
بس ما تسبحت .. خفت من الشمس .. ومالي خلق اصير سوده
بعد الغدا .. شربت جاي مع الاهل وما بقى حلو ما كليناه..
بنت عمتي كانت يايبه كيكة حلوة من بريد توك


كانت لذيذه حيــل واايد اعجبتني

ومن الحلويات اللي عجبتني بعد في يمعتنا كيك من مطحنة الفوز اول مره ادري ان عندهم كيك
شوفو صورته

وكيكة من سابليه


هم كانت لذيــذه
ولما صار المغرب ... تفاجئت بكيكه غيرهم مكتوب عليها هابي بيرذدي ووراها اسمي ( ماقدر اقوله :))) بصراحة استانست واايد .. حسيت اني جني ياهل ..
شوفو صورتها .. من الخباز

ما اقدر اقولكم اذا اهيا حلوة والا لا .. لاني كنت شبعاانه حدي بس خشيتلي شويه منها
عشان اكلها بعدين .. قمت اقصص منها واوزع لهم

مشكوورين اهلي على الكيكه والفرحة اللي دخلتوها لي .
الله يقدرني واردها لهم انشاء الله

الخميس، 27 مايو 2010

القياده لدون السن القانونيه ..الى متى ؟؟؟



اليوم الظهر للاسف .. حجزت الداخلية على 30 سياره يسوقونها شباب ما عندهم رخصة للقياده
وكانت في منطقة سلوى .. تتوقعون من المسئول ؟؟؟ الاهل ؟؟ والا الشباب نفسهم ؟؟ والا منو ؟؟ هل احنا لا نزال نحتاج الى توعيه في هذا الموضوع ؟ واحنا في ديره شايفه التطور وخيرها مغطي ع الكل ؟؟ شي يقهر والله
مع العلم ان الكل عارف مخاطر السياره بدون رخصه خصوصا لمادون السن القانوني للقياده
ما اقول الا الله يخفظ عيالنا ويعقلهم
يا ريت الاقي تفسير ... عندكم ؟؟؟
السلام عليكم ورحمة الله وبركاته

هذي اول رساله لي في مدونتي الجديده ..
هدفي من هذه المدونه واضح من العنوان .. جاكليت .. يعني ما راح اكتب عن موضوع واحد تقدرون تقولون معلومات متنوعه في كل شي والاهم منها انها ترسم الابتسامة لكم .
وارحب بكل من يشاركني فيها ..