السبت، 31 يوليو، 2010

تجربة أطفال

من تجهيزاتي لرمضان .. حلو كنت اسويه من زمان ..

تذكرته اليوم .. جان ابلش اسويه .. واثلجه بالفليزر حق الرمضان الياي .. الله يديمه علينا بالصحة والعافيه يا رب على الجميع .

وجهزت العجينة الخاصة فيها .. سويتي طبعا





وقمت قطعت الشريحة الى ثلاث قطع



بعدها كل وحده الفها رول .. والصوره تتكلم عني ..

ملاحظه : اللي عاجبني بالشغل كله انه اللي يسوي الحلو ويصفه بالصينيه .. بنتي مع بنت اختي ...

اخليكم مع الصور










وبعدها قلينا جم وحده بزيت غزير وبعدها غطسناهم بسكر ناعم ودارسين .. عن خاطرالبنات :)



بس ما سوينا الصلصة الخاصة فيها / اللي عباره عن 1 قيمر كي دي دي + 1 كيس دريم ويب
وبالوجه للتزيين كراميل .. ضروري الكراميل يعطيها طعم وايد حلو
قبل كنت اسوي نفس الطريقه بس كنت الفها بشكل مستطيلات واحطهم بجدر وبعدين اقلبه شوي شوي .. واربطه بشريطه حلوة حواليهم واصب فوقهم الصلصة والكراميل ... كانت حيــل عجيـبه ... بس هالسنة مليت من الشكل القديم .. قلت اغير ..:)
الاستفاده من العمل :
اول شي علمت بنتي وبنت أختي شي يديد عليهم .. ماكانوا يعرفونه ..
هالشغل هذا ..علم البنات الصبر .. خصوصا بنتي .. لانها من اول شريحتين لف .. ملت وقالت مالي خلق اكمل .. بس بعدين لما شافت الوضع فيه جد .. مو لعب .. كملت ..
هالشغل ... علمهم شنو معنى العمل الجماعي .. وشلون اذا اكثر من شخص اشتغلوا مع بعض .. بسرعه يخلص وبكل سهوله .
بعد ما انتهوا من العمل ... شافوا انتجاهم .. وشافوا انهم قادرين على العمل .. وهالشي عزز من ثقتهم بنفسهم ..
بعد ما شافوا انتجاهم جاهز للاكل .. حسوا انهم افراد تستحق الشكر ..
فعلا كانت تجربه ... واستفادوا منها ..واستحقوا الشكر عليها .. واتوقع انها راح تكون موجوده بذاكرتهم ... وما ينسوها ..
انتوا ؟؟؟ في لكم تجارب وانتو اطفال .. استفدتوا منها ... وما تنسونها طول حياتكم ؟؟؟


الجمعة، 30 يوليو، 2010

cold stone


كثير من الناس اللي مدحتلي برد cold stone واليوم وانا بالافينيوز قلت خل اجربه .. وكانت صديقتي تقوللي اذا رحتي طلبي الخلطة السريه الخاصة فيني .. لانها تدري انه ذوقي يتماشى مع ذوقها خصوصا بالاكل والطعم ..

رحت اليوم ومريت يمه .. جان اتذكر كلام صديقتي .. وكان المحل مافيه زحمة الحمدلله ..


قمت وطلبت الخلطة السريه مالت رفيجتي وقلت حق الفلبيني ابي الفانيليا .. بس اللي بالصوره تحت للاسف خاصة بنكهة الكاكاو


المهم بعد ما اخترت القانيليا قلته ابي تحط فوقها براونيز ..



وبعدها حط لي الكراميل مع الجوز .. حطهم وخلطهم مع بعض وقام يطقطق فيهم ..







واخيرا حطهم لي



رائيي الشخصي

بالنسبة حق البرد حسيت فيه نسبة كبيره من الحليب .. فما عجبني وايد

الجوز لما أكله احس لساني يقرصني مادري ليش ..؟؟

وعموما ما راح اطلب منه مره ثانيه .. والناس أذواق .. واول مره ذوقي يختلف مع ذوق رفيجتي

فيه احد عجبه ؟؟

شنو الخلطات اللي تحبونها في البرد ؟؟

الأحد، 25 يوليو، 2010

الهدف من وراء فتحك للمدونه

صار لي جم بوست احط بعض المواقع اللي يمكن نستفيد منها ..
بس اليوم ما راح احط موقع يديد .. راح اخليه ليوم ثاني :)
لانه اليوم ابي اتكلم عن موضوع مهم بالنسبة لي .. ومحيرني بنفس الوقت ..
الحين شنو الهدف من اني فتحت مدونة خاصة فيني ؟؟؟؟ وبعد ما فتحتها شنو راح استفيد ؟؟؟؟
ودي اقولكم قصتي مع جاكليت ...

بالبداية .. قبل لا انوي فتح مدونة ماكنت اعرف شنو يعني بلوق اللي كنت دايم اسمعها من عيال اخوي .. لين ما شرحلي ولد اخوي عنها وشنو يمكن احط فيها حسيت انها تجربه ممكن اعيشها واشوف نتايجها .. وفعلا قمت افكر شلون افتح مدونه لي .؟ لكن استصعبتها

لاني سمعت انه لازم يكون لي موقع خاص فيني !! وفيها رسوم اشتراك ومادري شنو ... خلاني افكر اني اهون وما افتح كللش بلوق ..

لكن في يوم من الايام وانا اتصفح النت شفت اعلان من قوقل انه تقدر تفتح بلوق بدون رسوم وبكل سهوله .. قلت خل اجرب .. وفعلا

تتبعت الخطوات الخاصة باعدادات البلوق واصبح الحين عندي بلوق او مدونة خاصة فيني ..:)) ( حدي مستانسة )

وكان شكل البلوق بالبداية كللش بسيط .. وكل يوم اقول لازم اغير شكله مو عاجبني ... لين وصلت الحين للشكل اللي تشوفونه الحين

( وتوقعوا انه يتغير .. باي وقت لين الاقي شكل حلو ) .

وبديت احط مواضيع مختلفه .. مره عن يومياتي .. ومره عن الطبخ .. ومره عن مطعم .. ومره عن اشياء اشوفها اما بالجمعيات والا مركز سلطان والا حتى بالسوق.. ومره عن مواقع .. مواضيع مختلفه عشان اقدر اخلي مواضيع مدونتي على مسماها .. جـاكــليت


لكن ...شنو راح استفيد من هالمدونة ؟؟؟؟؟ الحين .. وبعد ما صارت عندي واقدر اضيف اي موضوع انا ابيه ...

شنو العائد من ورا اضافتي لمواضيع مختلفه بين فتره وفتره ؟؟؟


سؤال محيرني ....؟؟؟؟!!!!!!!


ودي اسال كل شخص يمتلك مدونه خاصه فيه ... شنو هدفك الاساسي من فتحك لبلوق او المدونة ؟؟؟

لعل وعسى الاقي اجابتي من ضمن اجابتكم ؟؟؟


*************************************


انا لما اصير يوعانه .. ومالي خلق اكل البيت لانه يكون ممل بعض الاحيان ..

ما افكر الا بوجبه انا احبها حيـل واستانس على اكلها ..

احسها فيها طعم وذوق حلو ... وبنفس الوقت رخيصه وماهي غاليه

شوفوها بالصوره


سمبوسه جين + جباتي + صمون فلافل وبطاط او مشكل + شاني

هذا عشان اليوم .. :)

الخميس، 22 يوليو، 2010

وجهك بدلا من كلمة السر


من المعروف في نظام ويندوز انك تقدر تحط خاصية حماية الدخول لنظام الكمبيوتر .. بكل بساطة تدخل كلمة السر.. ويفتح لك الكمبيوتر على طول .. لكن ما الجديد في البوست هذا ؟؟

انا اقولكم .. الحين مع تطور التكنلوجيا .. تقدر تبدل كلمة السر بصورتك من خلال الكاميرا المرفقه بالكمبيوتر .

فمافي داعي تدخل كلمة السر .. اللي اغلب الناس ينسونها ..

فهذا برنامج يخلي الكمبيوتر الخاص فيك يتعرف على وجهك من خلال الكاميرا المرفقه .. يعني اول ما تفتح الجهاز تتعرف الكاميرا على صورتك .. اذا لقت صوره ولدك والا بنتك والا الخدامة والا اي احد ثاني ... مستحيـــل يفتح :)))))


اول ما يشتغل البرنامج عليك انك تتبع الارشادات الخاصه بالاعدادات وتقوم بتصوير نفسك من خلال الكاميرا المرفقه بالكمبيوتر .

واذا نويت تفتح الجهاز .. جهز ويهك عشان يتعرف عليك الكمبيوتر وتبدأ معك عملية الدخول الى النظام وعالم البرامج والانترنت :)))


ملاحظة : البرانامج هذا ما يلغي الدخول بواسطة كلمة السر .. مخلينه لك اختياري .. وعشان اذا كنت تبي تخول احدغيرك بالدخول للنظام الكمبيوتر .

هذا اسم البرانامج LUXAND BLIND

وما عليك الا انك تضغط على عباره .. GET LUXAND BLINK NOW


حجم البرنامج 8,6 MB

مجاني

يدعم ويندوز 7 ، وفيستا


السؤال :

هل هذا البرنامج وغيره من البرامج التي تتحرى الدقه في دخول نظام الكمبوتر مهمه جدا جدا ؟؟

ماهي الجهات التي تحرص على استخدام هذا النوع من البرامج ؟؟

هل يمكن ان يكون هناك أفراد تحرص على استخدامها بعيدا عن التسليه ؟؟


هل انتم ممن يحب تجربتها .... واستخدامها ؟؟؟




الاثنين، 19 يوليو، 2010

وجهك بعد 30 سنة


ودكم تشوفون ويهكم بعد 20 أو 30 سنة ..
ودكم تشوفون شنو التغييرات اللي راح تصير على ملامح ويهكم ؟
ارفع صورتك على هالموقع www.in20years.com
واختار الفترة الزمنية واضغط على عباره
" upload your photo "
ولكن .....
هناك سؤال مهم ...
هل النظر الى الوجه في المرآه .. وملاحظة وجود بداية تجاعيد على الوجه يؤثر في النفس ؟؟
ان كان هناك تأثير هل هو سلبي ام ايجابي .. ولماذا ؟؟
وما مدى هذا التأثير ؟

الثلاثاء، 13 يوليو، 2010

أول كاميرا شخصية للبث المباشر


طرحت احدى الشركات اليابانيه كاميرا شخصية صغيره الحجم .. تعتبر اول كاميرا شخصية تقدرتبث تصوير الفيديو مباشرة عبر الانترنت دون الحاجة الى كمبيوتر ..

هذي الكاميرا ما تحتفظ بالافلام مثل كاميرات الفيديوالعادية .. لكنها تتصل في الانترنت لاسلكيا عبر الـ " wifi " .. او شبكة " 3G " الخاصة بشبكة الهواتف الجواله .. فينتقل الفيديو من الكاميرا الى الانترنت مباشرة الى مواقع خاصه بالبث المباشر .. مثال : http://ustream.tv

سعرها تقريبا 216 دولار
هذا موقعهم http://cerevo.com


شرايكم فيها .... ؟؟؟

الاثنين، 12 يوليو، 2010

الافلام الكوميديه لم نشاهدنا بعد ..

بعض الافلام الكوميديه اللي نزلت في مصر .. ولم تنزل بعد الكويت

أول شي فلم : عسل اسود ...

بطولة الفنان الكوميدي أحمد حلمي .

انا واايد استانس على هالفنان .. احس تمثيلة ما فيه تصنع واايد .. واحسه بعد يجيد التمثيل حيــل .. اذا حطوه كوميدي يضحكني .. واذا حطوه تراجيدي يبجيني .. احسه فاهم بالتمثيل عدل .. وكل اللي حضرو هالفلم ( طبعا اللي سافرو مصر وشافوه .. لانه ما نزل بالكويت بعد ..) يمدحونه حيــل .. يقولون .. انه احسن فلم نزل بمصر .. .. قبل لا نشوف بعض المشاهد للفلم .. ودي احط لكم ملخص الفلم ..
ملخص الفلم : "مصري سيد العربي" الذي ترك مصر وهاجر لأمريكا مع والديه وهو في العاشرة من عمره، وبعد عشرين عاما يعود لبلده رغبة في الاستقرار بها بعد وفاة والديه ويواجه العديد من المفارقات الناتجة عن اختلاف الزمن والثقافات حيث يحمل جواز سفر أمريكي وهو ما يجعل الجميع يتعامل معه معاملة حسنة الي ان يتعرض لحادث يفقد فيه هذا الجواز فتتغير معاملة الجميع معه إلى النقيض فيقرر التمرد على هذا الوضع ..
الفلم وايد فيه تطنز على الكلام المصريين اللي يقلبون اللغه الانجليزيه من thanks ثانكس الى سانك :))

تصنيف الفلم .. كوميدي اجتماعي



الفلم : اللمبي 8 جيجا


بطولة الفنان محمد سعد .. مع اني ما احب تمثيله .. احسة فيه تصنع مبالغ فيه حيــل .. وكل أفلامه نفس الحركات ونفس الادوار .. ودي مره اشوفه في دور تراجيدي أو دور جاد شوي مافيه ضحك ..مادري ليش احسه ما يمثل .. احسه اهوا جذيه .. بس معاه الفنانه مي عز الدين اللي انا وااايد أحبها .. واستانس حيــل على تمثيلها .. اتوقع انها اهيا اللي شايله الفلم مو محمد سعد .. ولو بروح له .. بروح عشانها .


ملخص القصة : اللمبي ..محامى فقير يتزوج من مدرسة و يتسبب في تعرض زوجته للعديد من المشاكل نظراً لظروفه المادية السيئة و التي لا تتناسب مع الأسعار الموجودة حالياً كما يتعرض الي حادث يتسبب في تغيير حياته .


تصنيف الفلم : كوميدي اجتماعي

في فلم ثالث كوميدي .. بس نزل الكويت وشفناه .. ( ثلاثة يشتغلونها )


بس في فلم بعد .. هم يمدحونه حيــل .. اسمه


الفلم : لا تراجع لا استسلام ..


بطولة الفنان أحمد مكي .. هالفنان احسه مبدع .. وايد يضحكني


احس له مستقبل كبير في أدوار الكوميديا .. يمكن اغلب الناس ما يعرفونه الا بكشته اللي يلبسها .. اللي يذكر فلم مرجان أحمد مرجان حق عادل امام اكيد يذكره :) بس بالفلم هذا مو لابسها : .. حسافه :))))


ملخص القصة :تدور الأحداث حول شخصين الأول أدهم (أحمد مكي)وهو ابن رئيس أكبر عصابة لتهريب المخدرات والمستهدفين لدى الشرطة (عزت أبوعوف) و تبدأ الأحداث بمطاردات بين هذه العصابة و الضابط المكلف بالقبض عليها(ماجد الكدواني) و تستمر المطاردات و الخطط للقبض على العصابة حتى يموت أدهم فيأتي الدور الثاني لـ(مكي) حذلئوم و هو شاب فقير يود السفر للخارج ليجد مهنة فيأخذه الأمن المصري ليوم بمساعدته في القبض على العصابة مقابل مبلغ من المال وتتوالى الأحداث في إطار أكشن كوميدي

للاسف ما لقيت فيديو للفلم بحط لكم البوستر الخاص فيه ..


وسلامتكم .. يالله منو أكثر فلم راح تروحون له ؟؟

عن نفسي ... كلهم أن شاء الله :))) وانتو .؟؟؟؟

الثلاثاء، 6 يوليو، 2010

سمبوسة .. يا سمبوسة


اليوم يايبه لكم طريقه عمل سمبوسة .. واايد حلوة .. وعجبتني .. والاشخاص النباتيين اللي مثلي راح تعجبهم حيــل ..

نبتدي بسم الله
اول شي المقادير..
عجينة السمبوسه .. ماركة سويتي

فلفل اخضر بارد .. مقطع الى قطع صغيره ..


جبن كرافت مبشور... العلبة الزرقه .. كما هو واضح بالصوره .. ( موجود في الجمعيات التعاونيه )

جبن فونك مبشور .. ( موجوده في الجمعيات التعاونيه )



جزر مبشور..



بيض .. وحده اوثنتين كافي ..



طحين أبيض مذاب بقليل من الماء ..( للتحكم باغلاق السمبوسه )


بقسماط .. لتغليف السمبوسة ( موجود بالجمعيات التعاونيه )



خلصنا من المقادير .... الحين وقت الطريقه .. ما راح اعلق .. الصور واضحة ومعبره ..شوفوها..





















يمي ..يمي .... لذيذة ..

وعشان تخلصون بسرعه .. خلطوا المقادير مع بعضها ..


وبالعافيه ... :)

ملاحظاتي عليها :

سريعه التحضير ... وخصوصا لو تسوينها بفتره وتحطينها بالفليزر ..ومتى ما تبينها تقلينها بس

ما تشرب دهن وايد ..لانها مغلفه بالبقسماط

طعمها حلو .. لانه فيها نوعين من الجبن ( لمحبي الاجبان )

شرايكم ... ؟؟؟؟

الخميس، 1 يوليو، 2010

كيوي للاحذيه

انتاج شركة كي وي .. الخاصه بالاحذية
  • مزيل للعرق .. يزيل الرائحة الكريهة ... فكرته فكرة مزيل العرق :)
  • ومبيض للاحذية .. يصلح للجلود والاقمشة .
  • بخاخ يعمل على توسعة الحذاء .
  • منظف للاخذية 3 بواحد.
نشوف الصور ..





موجودين بمركز سلطان ...

وهذا موقعهم