ورجعت من الدوام تعبانه .. وقلت ودي انسدح شوي ..رحت لفراشي وتوني لاامه مخدتي الا تييني بنتي .. وصار هالحوار ..
البنت : اماا اماا .. هالايام مافي يمه
الام : تسمع وتسوي روحها نايمه
البنت : امااا اماا ساعديني
الام : ترد عليها بدون ما تشوفها .. لانها اذا شافتها ما تقدر تقاوم طلب البنت
شتبين ؟؟؟
البنت : اماا شوفي . شوفي
الام : وهي مغطيه راسها باللحاف ... ششوف ؟؟
البنت : اماا شوفي .. ساعديــني
الام : تتنهد وتوخر اللحاف .. هاه ششوف وشساعدج فيه ؟
البنت : ابيج تسوين لي البوستر هذا
الام : وانتي ليش ما تسوينه ؟؟
البنت : اماااا رفيجاتي كلهم سووه بالمدرسه
الام : وانتي ليش ما سويتيه مثلهم ؟؟
البنت : ماكان عندي وقت .. وسويت شويه وطلع مو حلو
الام : رضت بالامر .. وقررت تسويه .. لانها تدري انه بنتها ماتعرف صج
وين البوستر اشوفه ؟
البنت : كاهو
الام : يا حظي شهالخط
البنت : اماا .. قلبي الورقه وكتبيه ... ابيه بالالوان .
يحدث صمت بالبيت .. الام تقولب بالورقه .. والبنت تفتح التلفزيون على قناتها المفضله
البنت : اماااااا
الام : وييعه خرعتيني .. شتبين ؟؟
البنت : اماا يوعانه ابي غدااا
الام: دقي على الخدامه وقولي لها تسوي لنا همبرغر وبطاط .
تروح البنت يم التلفون وتتصل على الخدامه على الرقم الداخلي الخاص فيها وتوصيها على الغداا .
الام حايسه بالوسيله .. شنو تبيني اكتب ؟ وعن شنو موضوعكم ؟؟
البنت : نبي نبيع بوب كورن
الام : تبيعون ؟؟؟
البنت : ايه .. والفلوس راح نعطيها حق الفقاره
الام : اعجبتها الفكره ولقتها فرصه انها تقوم بدور الداعيه الاسلاميه .. والله زين يعلمونكم شلون تساعدون الفقاره .. والمحتاجين ..
يا بنتي دينا الاسلامي يحثنا على مساعده الفقراء والمحتاجين ..وشوفي كم من الاجر راح ناخذ .. ورسولنا الكريم صلي الله عليه وسلم .. وصانا على هالشي
البنت : ويها تغير .. وعيونها راحت للتلفزيون . وفي قلبها تقول .. والليييه انتي الحين سوي البوستر وفكيني . انا بروحي غصب افتكيت من ابله الدين وانتي هني بعد ؟؟؟؟
الام : حست ببنتها .. وقامت تغير الموضوع .. و تقولب بالبوستر ..وين القلم الرصاص والمحايه والمسطره ..؟
البنت : راحت تجهز لامها الاغراض ..
هاج يمه .. ابيه يكون بالاوان .. ابيه يصير حلو ..
الام : طرار ويتشرط !!!
شرايج اطبعها لج بالكوبيوتر ؟؟
البنت : لااااااا التيشجر ماترضى .. تقول لاازم بخطكم
الام : والتيشجر على قولتج .. ما راح تعرف يعني انه مو خطج ؟؟
البنت : اماا انا راح اقولها انج ساعدتيني
هاتي .. وبدت الام تخط البوستر وكتبت الكلام اللي بنتها تقوله لها .
واثناء ماهي تكتب حبت تتغشمر مع بنتها ... ما تبين بعدارسم لج صوره ؟؟
البنت : ايييييييه .. ابيها حلوة
الام : توهقت ... تقول بينها وبين نفسها .. يا ليتني ما حجيت كللش .. انا اللي يايبته لنفسي .
وقامت ترسم الرسمه
.. والبنت شنو كانت تسوي؟؟.. طبعا كانت تشوف هذا
يت الخدامه ومعاها الغدا وحطته ومشت ..
والام لاهيه بالبوستر ..تبين الوان خشبيه والا شينيه ؟؟
البنت : وهي تاكل الصمون .. لاااا مابيها خشبيه ابيها بالوان حلوة
الام : تلون .. وعينها على الغداا .. انا الحين اسويلج البوستر وانتي تاكلين ؟؟
وخري خل اسوي لي صمونه يعت ..وبدت الام تاكل غداها .. دفيقتين .. والا ترجع للبوستر .. لاازم تخلصه
وبدت تلون البوستر
واثناء التلوين انتبهت الام للي مكتوب .. تعالي صج منو بيرو هذول .. اللي بتعطونهم فلوس ؟؟
البنت : اماا بيرو هذولا فقاره
الام : انزين فقاره .. بس من اهما ؟؟ ومن وين ؟
البنت : التيشجر قالت لنا .. هذي دوله بامريكا فقيره ويبون يودون فلوس لهم عشان يساعدونهم
الام : عشتوو ... الحين ما لقو الا بامريكا .. خل يساعدون اللي عندنا ديرتنا هم فيها فقاره واهما اولى
جني هونت مابي اكمل بوسترج
البنت :امااااااا
ويبدو على ويها الغضب
الام : انزين خلاص بكمله .. ما يندره يمكن ناخذ اجرفيهم
ورجعت الام تكمل البوستر
حطيت لج كوريكتر .. جنه نفيش ..
امج مو سهله .. والله ... يا حلاتي وانا افنتق بالالوان
يالله شوفيها .. شرايج ؟
البنت : اللــــه .. حلوة ... انا احسن وحده بالصف مسويه البوستر .. هيييييي خذتها وراحت دارها تخشها بجنطتها وخلت الام..
الام: وعلى ويها علامه استغراب وتعجب .. وتقول حق عمرها .. الحين منو اللي مسويها انا والا اهيا ؟؟
حتى كلمة مشكوره مافي ؟؟؟
البنت : رجعت من دارها وراحت لامها .. اماااا .. مشكوووره وباست راس امها
الام : والله فشله حكمت على بنتي بسرعه ؟؟ صج اني انا الياهل مو اهياا
وسلامتكم
يحليلها بنتج والله يخليكم لبعض :)
ردحذفتسلمين ..
ردحذف:)
عساج بخير جاكليته ..
ردحذفالبوستر حلو واعجبتني حركة نثرت النفيش على الزاوية.. ما شاء الله رغم التعب قدرتي تفنتكين
بالبوستر .. الظاهر بنيتج في مدرسة أجنبية
من جذي المساعدة برّه .. وإلا مو قلة الققاره في الكويت .. الله يتمم على الجميع الصحة والعافية .
وياحلات البنات حلاتهم
ردحذفالله يخليلج اياها ويبلغج فيها وانتي بصحه وعافية
تدرين .. ماتصورتج أم .. حسيتج بنيه صعنونه .. حلوه وامورة
وانتي اموره .. أم أموره
مدونه جميلة وشفافه :)
روميه
ردحذفالله يخليج .. تسلمين
ايه .. شفتيه .. استخدمت الكوريكتر هههه ماكو لون ابيض الا اهوا
صح كلامج ما شاء الله عليج .. فعلا المساعد برا لانهم مدراس اجنبيه
وتسلمين .. آآمين يا رب
الوتين
ردحذفمشكووره حبيبتي على كلامج الطيب
ايه شكلي انا البنت وابيتي الام هههههه
تشرفت بتواجدج معاي في مدونتي
انتي الاجمل :)
الله يخليلج بنوووتج يحليلها ،
ردحذفالبوستر يوّنس تسلم ايدج لول ، حبيت حركة البوب كورن D:
سويت هارت
ردحذفتسلمين حبيبتي
هههههه ايه شفتيني وانا مفنتكه ..
المره اليايه بسويه سويت بوب كورن :).. هذا مالح هههههههه
لووووول حدها اذية الله يخليها لج :)
ردحذفههههههه
ردحذفطبعاً و أنا مغمضه دريت أنه بنتج بمدرسة خاصة
نفس هباتنا ايمعون حق دول مادري وين؟
عاد أنا نفس ردج ، أقول و إحنا شكو فيهم؟!!
بس الاحمدالله آخر تبرعات كانت للهلال الأحمر :)
مدونة حلوه
موفقه
في أمان الله
اشكرك على المدونه الرائعه
ردحذف